في ظل الأوضاع الراهنة... كلمة مؤثرة للسيدة ماجدة الرومي عن لبنان: "شو هالمجزرة يلي ما عادت تخلص؟" (فيديو)

ألقت السيدة ماجدة الرومي كلمة مؤثرة عن لبنان خلال افتتاح حفلها الخيري "كرمال عيونك يا لبنان" ضمن مبادرة "الإمارات معك يا لبنان" بالتعاون مع مؤسسة "دبي للعطاء"، في دولة الإمارات اليوم الإثنين.

وجددت الرومي من خلال كلمتها دعمها ومساندتها لأبناء بلدها وقالت: "منلتقي اليوم بظروف لبنانية استثنائياً صعبة ومأساوية. منلتقي اليوم لنوقف هالوقفة التضامنية مع لبنان وأهله وأنا بعرف إنو ما حدا فينا مبسوط. أي لبناني مبسوط يشوف بلده عم يتدمر؟ اهله وناسه عم ينقتلوا عم ينصابوا ويتهجروا بهالحرب يلي يا ريتا ما كانت. ولا كان هالخراب يلي عم نشوفوا ولا هالضيع يلي عم تتدمر ولا هالخسارة الرهيبة بالأرواح وبالأرزاق. شو هالمجزرة يلي ما عادت تخلص من الـ75 لهلق متل كأنو نحنا مندورين للموت شو هني هالأغلاط المتراكمة يلي حولتنا مع السنين لساحة لتصفية كل الحسابات".

وأضافت الرومي: "أنا متألمة وحزينة متل كل اللبنانيين بس اذا كان مطلوب مني غني تأوقف لبلدي وأهلي وناسي يلي هني بحاجة لالي اليوم رح غني وبقول لما توصل لهون لما ينسرق منا القرار اللبناني الحر لما يتفكك لبنان متل ما عم نشوف بصير كل واحد فينا مسؤول قدام الله وضميره عن مصير لبنان ما بقى حدا ينطر حدا".

وتابعت: "كل مؤمن بسيادة لبنان هو لبناني حر وين ما كان مزروع وشو ما كانت مهنته ومهنته هي سلاحه المرفوع تجاه كل ظلم عم يتمارس ضدنا".

وجاء في كلمة الرومي أيضاً: "دعيتني دولة الإمارات الله يزيد عزها ومجدا لأوقف هالوقفة هون وجيت ومعي سلاحي وهو صوتي جيت غني وجيت دافع عن لبنان الحلو، لبنان الوديع، لبنان المسالم، لبنان الفن، لبنان الثقافة، لبنان الفكر الحر، لبنان الابداعات والتجلي بكل المجالات هيك جيت دافع بصوتي عن سيادة لبنان عن عروبتو، لبنان عربي منتمي للأرض العربية، جيت دافع عن أرضو،عن شعبو، عن جيشو اللبناني الحبيب وأنا بعرف انو قدر لبنان صعب بس بعرف كمان انو ارادة اللبنانيين أقوى من كل موت، قولولي بس أي كارثة أي مصيبة نهيت اللبنانيين كل فخ بينصبولنا ياه ولا التاني كل مرة منقول هيدي آخر مرة كل مرة الشعب اللبناني بينتفض وبيوقف عإجريه هيدا الشعب الجبار البطل المغوار هيدا شعبي يلي بدي وجهلو تحية الليلة".

وختمت: "جيت وجه تحية للبنانيين وجيت قلن بمعاناتكن وبدموعكن بدي ضمكن لقلبي وما افلتكن دقيقة ولكل المؤمنين بسيادة لبنان يا اخوتي اسمعوني نحنا وربنا والحق وأرضنا منا قلال نحنا منكفي لبكرا بقوة الله وشي نهار قريب بيولد منا نحنا لبنان حر سيد ومستقل بس من هلق لوقتا مطلوب من المؤمنين بسيادة لبنان يعتبروا نفسهم إنهن من الاحتياط تبع الجيش اللبناني كل واحد فيكن عسكري بالجيش اللبناني كل واحد فيكن يقول معي انتقاماً لكرامتنا وشرفنا اللبناني أقسم بالله العظيم أن اقوم بواجبي كاملاً دفاعاً عن علم بلادي  وزوداً عن وطني لبنان".

 

View this post on Instagram

 

A post shared by Majida El Roumi (@majidaelroumi)